விடுதலைப்புலிகளின் தொழில்நுட்பத்தை பயன்படுத்தும் வடபிராந்திய பேருந்து உரிமையாளர்கள்!!

யுத்த காலத்தில் தமிழீழ விடுதலைப்புலிகள் பயன்படுத்திய வாகன எரியூட்டல் தொழில்நுட்பத்தை தற்பொழுது வடபிராந்திய பேருந்து ஊழியர்களும் பயன்படுத்தி வருவதாக தகவல் கிடைத்துள்ளது. இதனால் குறைந்த செலவில் அதிக இலாபத்தினைப் பெறமுடிவதாக சம்மந்தப்பட்ட பேருந்து உரிமையாளர் ஒருவர் குறிப்பிட்டுள்ளார்.

இலங்கையில் தனியார் போக்குவரத்துத் துறையில் காணப்படும் போட்டித்தன்மைகளாலும் எரிபொருள் விலையேற்றங்களினாலும் குறுந்தூர மற்றும் நெடுந்தூர பேருந்து உரிமையாளர்கள் மிகுந்த வருமான இழப்பினைச் சந்தித்து வருவதாகவும் இதற்கான ஒரு மாற்று மார்க்கமாகவே விடுதலைப் புலிகளின் இந்த வழிமுறையினைப் பயன்படுத்துவதாகவும் அவர்கள் சுட்டிக்காட்டுகின்றனர்.

குறிப்பாக வட மாகாணம் மற்றும் வடமத்திய மாகாணம் போன்றவற்றில் சேவையில் ஈடுபடும் பேருந்து உரிமையாளர்கள் இந்த வழிமுறையினால் நன்மையடைந்துள்ளதாகக் குறிப்பிடுகின்றனர்.

இந்த நன்மைக்கான காரணம் என்ன?

பொதுவாக கனரக வாகனங்களின் எரியூட்டல் தொகுதியானது டீசலையே மூலாதாரமான எரிபொருளாகக் கொண்டிருக்கும். காரணம் அவற்றின் பழு கூடிய இயக்கத்திற்கு பெற்றோலை விட டீசல் தான் குறைந்த செலவினத்தை ஏற்படுத்தக்கூடியது.

ஆனாலும் டீசலை விட விலை குறைந்தது மண்ணெண்ணெய், அதனைக் கொண்டு பழு கூடிய வாகனங்களை இயக்கமுடியுமா என்ற கேள்விக்கு தமது அபாரமான தொழிழ் நுட்ப திறத்தினால் விடை கண்டவர்களே விடுதலைப் புலிகள்.

ஈழத்தில் கடும் யுத்தம் நிலவிய காலத்தில் பெற்றோல் டீசல் என்பவற்றிற்கு கடும் தட்டுப்பாடு ஏற்பட்டிருந்தது. காரணம் அவை அத்தியாவசியமற்ற பொருட்கள் அல்ல எனக் குறிப்பிட்டு ஸ்ரீலங்கா அரசாங்கம் விடுதலைப் புலிகளின் கட்டுப்பாட்டுப் பிரதேசங்களுக்கு அனுப்புவதைத் தடைசெய்திருந்தது.

ஆனால் அந்தக் காலத்தில் மின்சார வசதி இன்மையால் மக்கள் பெரும்பாலும் மண்ணெண்ணையைத் தான் நம்பியிருந்தனர். அதனால் மண்ணெண்ணெய் தாராளமாகக் கிடைத்தது.

இந்த நிலையில் தமது வாகனங்களுக்கு எரிபொருள் இன்மையால் தமிழீழ விடுதலைப் புலிகள் மாற்று வழி ஒன்றினைத் தேடினார்கள். அதன்படி கண்டுபிடிக்கப்பட்ட வழிமுறையே ‘பெற்றோலுக்குப் பதில் மண்ணெண்ணெய், டீசலுக்குப் பதில் மண்ணெண்ணெய்’ தொழிநுட்பமாகும்.

இதனால் யுத்த காலத்திலும் விடுதலைப் புலிகளின் தடையின்றிய வாகன இயக்கத்தினைக் கண்டு ஸ்ரீலங்கா அரசாங்கம் மட்டுமன்றி அண்டை நாடுகளும் வியப்போடு நோக்கியிருந்தன.

டீசல் எரியூட்டல் தொகுதியில் சிறிய மாற்றம் ஒன்றினைச் செய்வதன்மூலம் இந்த மாற்றுவழித் தந்திரத்தைப் பயன்படுத்தமுடியும்.

தற்போது விடுதலைப் புலிகளின் அதே எந்திரவியல் தொழில்நுட்பத்தில் பேருந்து ஒன்றின் எந்திரத்தில் மாற்றம் செய்வதற்கு வெறும் 3500 ரூபா மட்டுமே செலவாகின்றதாக சொல்கிறார்கள்.

இக்கட்டான சூழ்நிலையில் கண்டுபிடிக்கப்பட்ட விடுதலைப் புலிகளின் மேற்படி தொழிநுட்பம் தமக்கு மிகுந்த இலாபத்தினைப் பெற்றுத் தந்திருப்பதாக பெயர் குறிப்பிட விரும்பாத நபர் ஒருவர் குறிப்பிட்டுள்ளமை இங்கே சொல்லக்கூடியதாகும்