அளவெட்டி தெற்கு பகுதியில் புனர்வாழ்வு பெறாமல் தங்கியிருந்த போது திங்கட்கிழமை (06) இரவு கைது செய்யப்பட்ட முன்னாள் போராளியை 75,000 ரூபாய் சரீரப் பிணையில் செல்ல மல்லாகம் மாவட்ட நீதவான் சி.சதீஸ்தரன் செவ்வாய்க்கிழமை (07) அனுமதியளித்தார்.
அத்துடன், மேற்படி சந்தேகநபர் புனர்வாழ்வு பெற்றாரா, இல்லையா என்பது தொடர்பில் விசாரணை செய்து அடுத்த வழக்கு விசாரணையான ஓகஸ்ட் மாதம் 03ஆம் திகதி, மன்றில் அறிக்கை சமர்ப்பிக்குமாறு தெல்லிப்பளை பொலிஸாருக்கு, நீதவான் உத்தரவிட்டார்.
பொலிஸாரின் அவசர தொலைபேசி இலக்கத்துக்கு கிடைக்கப்பெற்ற தகவலை அடுத்து சக்திவேல் இராஜகுமரன் (வயது 41) என்பவர், கடந்த திங்கட்கிழமை கைது செய்யப்பட்டார்.
கைது செய்யப்பட்ட இவரிடமிருந்து கடவுச்சீட்டு, நிலஅமைப்பு வரைபடங்கள், வங்கிப்புத்தகம் என்பன கைப்பற்றப்பட்டதுடன், தமிழீழ விடுதலைப் புலிகளை மீளஉருவாக்கும் செயற்பாட்டில் இவர் ஈடுபட்டதாகவும் பொலிஸார் தெரிவித்திருந்தமை குறிப்பிடத்தக்கது.
