பிரபாகரனின் கோரிக்கைகள் நியாயமானவை. ஆனால் அதற்காக பின்பற்றிய வழிமுறை பிழையானது. அதனை ஏற்றுக்கொள்ள முடியாது என பொதுபலசேனா தெரிவித்தது.
ஜனாதிபதியுடன் இணைந்து அமைச்சர் வாசுதேவ நாணயக்கார பட்டம் விடுவதால் இனங்களிடையே நல்லிணக்கத்தை ஏற்படுத்தி விட முடியாது என்றும் அவ்வமைப்பு தெரிவித்தது.
கொழும்பில் நேற்று முன்தினம் செவ்வாய்க்கிழமை இடம்பெற்ற பொதுபலசேனாவும் அகில இலங்கை இந்து சம்மேளனமும் இணைந்து இனங்களிடையே நல்லிணக்கத்தை நிறைவேற்றவுள்ளதாக பொதுபல சேனாவின் செயலாளர் கலகொட அத்தே ஞானசார தேரர் தெரிவித்தார்.
இந்த நாட்டில் பௌத்த, இந்து மதங்களைப் பாதுகாப்பதற்காக “பௌத்த, இந்து தர்மாரக்ஷன சபாவ” எனும் அமைப்பை ஏற்படுத்தியுள்ளோம். இதன்மூலம் இரண்டு தரப்பும் முகங்கொடுக்கும் பிரச்சினைகளுக்கு தீர்வுகள் காணப்படவுள்ளதாக ஞானசார தேரர் குறிப்பிட்டார்.
இங்கு தேரர் தொடர்ந்து உரையாற்றுகையில்;
தமிழ் மக்களின் பிரச்சினைகளின் தீர்வுக்காக பிரபாகரன் முன்வைத்த கோரிக்கைகள் நியாயமானவை.
அதேபோன்று 1987 /89 களில் ஜே.வி.பி.யினர் முன்வைத்த கோரிக்கைகளும் நியாயமானவை. ஆனால் தமது கோரிக்கைகளை நிறைவேற்றிக் கொள்வதற்காக இந்த இரண்டு தரப்பினரும் பின்பற்றிய வழிமுறை பிழையானது.
அதனை ஏற்றுக்கொள்ள முடியாது. கோரிக்கைகளை நிறைவேற்றிக்கொள்ள ஆயுதமேந்துவது நாட்டுக்கு எதிரான சட்டவிரோத செயலாகும். இதனை ஏற்றுக்கொள்ள முடியாது.
பிரிவினைவாதம்
புலிகள் முழுமையாக அழித்தொழிக்கப்பட்டு யுத்தம் முடிவுக்கு கொண்டு வரப்பட்டது. ஆனால் உள்நாட்டிலும் வெளிநாடுகளிலும் இன்றும் இலங்கையில் பிரிவினைவாதத்தை ஏற்படுத்தும் நகர்வு முன்னெடுக்கப்பட்டு வருகின்றது.
பாதிரியாரின் உடைகளுக்குள் இன்று பிரிவினைவாதமும் மறைத்து வைக்கப்பட்டுள்ளது. இராயப்பு ஜோசப் இந்துக்களை கிறிஸ்தவர்களாக மதம் மாற்றி சர்வதேச சக்திகளின் பிரிவினை வாதத்திற்கு உந்து சக்தி வழங்குகின்றார்.
இனங்களுக்கிடையே மதங்களுக்கிடையே நல்லிணக்கத்தை ஏற்படுத்த கீழ் மட்டம் மத்திய மற்றும் உயர் மட்டம் என பல்வேறு மட்டங்களில் செயல்வடிவில் நடவடிக்கைகளை எடுக்க வேண்டும்.
சமூக ஒருமைப்பாட்டுக்கென அமைச்சு உருவாக்கப்பட்டு அதற்கு அமைச்சர் வாசு தேவ நாணயக்கார நியமிக்கப்பட்டுள்ளார். ஆனால் இந்த அமைச்சினால் அதற்கான ஆக்கபூர்வமான எதுவிதமான நடவடிக்கைகளும் எடுக்கப்படுவதில்லை.
ஜனாதிபதி மஹிந்த ராஜபக் ஷவுடன் இணைந்து காலி முகத்திடலில் அமைச்சர் வாசு பட்டம் விடுவதால் இனங்களுக்கிடையே நல்லிணக்கத்தை ஏற்படுத்த முடியாது. நல்லிணக்கம் என்ற பட்டம் இன்று திசை திரும்பி பறந்து கொண்டிருக்கின்றது. அதனை சரியான திசைக்கு கொண்டு வரும் பொறுப்பை நாம் ஏற்றுக்கொண்டுள்ளோம் என்றார்
