தமிழ் மக்களின் எதிர்பார்ப்புக்களை நிறைவேற்றக்கூடிய ஆளுநர் ஒருவர் வட மாகாணத்திற்கு கிடைத்துள்ளார். அதற்கு நாம் ஜனாதிபதி மைத்திரிபால சிறிசேனவிற்கு நன்றி தெரிவிக்க வேண்டும் என வட மாகாண முதலமைச்சர் சி.வி.விக்னேஸ்வரன் தெரிவித்துள்ளார்.
முன்னாள் தெங்கு பயிர்ச்செய்கைக்கான இராஜாங்க அமைச்சர் ரெஜினோல்ட் குரே, வடமாகாணத்திற்கான ஆளுநராக இன்று தனது கடமைகளை உத்தியோகப்பூர்வமாக பொறுப்பேற்றுக் கொண்டார்.
அந்த நிகழ்வில் கலந்து கொண்டு உரையாற்றும் போதே வடமாகாண முதலமைச்சர் மேற்கண்டவாறு தெரிவித்தார்.
அவர் மேலும் தெரிவிக்கையில்,
பல தகைமைகளுடைய ஆளுநர் ஒருவர் வடமாகாணத்திற்கு நியமிக்கப்பட்டுள்ளார். எமது ஆளுநர் ஒரு ஆசிரியராக இருந்தவர். ஆசிரியராக இருப்பவர்கள் கொடுப்பதற்காக இருக்கின்றார்களே தவிர, எடுப்பவர்கள் இல்லை. எதையும் மற்றவர்களுக்கு கொடுக்க வேண்டுமென்ற அன்பு மனப்பாங்கினைக் கொண்டவர்கள்.
தமிழ் பேசும் ஒருவர். எமது மொழியை பேசும் ஒருவர் வடமாகாண ஆளுநராக வருகை தந்திருப்பது எமக்கு மகிழச்சி தரக்கூடிய ஒன்றாகவே இருக்கின்றது. அத்துடன் அவர் எமது மனோநிலையை அறிந்து செயற்படுவார் என்பதில் தாம் அதீத நம்பிக்கை கொண்டிருப்பதாகவும் அவர் மேலும் தெரிவித்தார்.
