தமிழ் மக்கள் பேரவையின் நிகழ்வு நாளைமறுதினம்(புதன்கிழமை) யாழில் நடைபெறவுள்ள நிலையில் தமிழீழ விடுதலை புலிகளின் புலிச் சின்னத்துடன் பலருக்கும் அழைப்பு கடிதங்கள் அனுப்பி வைக்கப்பட்டுள்ளமை மக்கள் மத்தியில் பெரும் அதிர்ச்சியினை ஏற்படுத்தியுள்ளது.
“மாபெரும் எழுச்சி தலைவன் வழியில் மக்கள் மேலவைத் தலைவன் கைகளைப் பலப்படுத்துவோம்“ எனப் குறிப்பிடப்பட்டு தமிழ் மக்கள் பேரவையால் புலிச் சின்னம் பொறிக்கப்பட்ட அழைப்பிதழ் மற்றும் துண்டு பிரசுரம் வெளியிடப்பட்டிருக்கின்றமை பலருக்கும் அதிர்ச்சியை ஏற்படுத்தியுள்ளது.
இதேவேளை, தமிழ் மக்கள் பேரவையின் கூட்டமும் வட மாகாண முதலமைச்சர் சி.வி விக்கினேஸ்வரனின் அரசியல் பிரவேச அடுத்த கட்ட அறிவிப்பும் நாளை மறுதினம் யாழ் நகரிலுள்ள மண்டபத்தில் நடைபெறவுள்ளது.
இதற்கான அறிவிப்பு தமிழ் மக்கள் பேரவையால் பலருக்கும் விடுக்கப்பட்டுள்ள நிலையிலேயே குறித்த அழைப்பிதழும் அனுப்பப்பட்டுள்ளமை மக்கள் மத்தியில் பலத்த சந்தேகத்தையும் குழப்பத்தையும் ஏற்படுத்தியுள்ளது.
இதுதொடர்பில் ஈ.பி.ஆர்.எல்.எப். கட்சியின் தலைவரும், தமிழ் மக்கள் பேரவையின் முக்கியஸ்தருமான சுரேஸ் பிரேமச்சந்திரனை தொடர்பு கொண்டு வினவியது.
தமிழ் மக்கள் பேரவையின் நிகழ்வுகளை குழப்பும் வகையில் இந்த அழைப்பிதல்கள் அனுப்பி வைக்கப்பட்டிருக்கலாம் என சந்தேகம் வெளியிட்டுள்ள அவர், இதுவரையில் குறித்த அழைப்பிதலை தாம் பார்க்கவில்லை எனவும் தெரிவித்தார்.
