யாழ்ப்பாணம், மடம் வீதியில் குடும்பத் தலைவர் ஒருவரை வாளால் வெட்டிய குற்றச்சாட்டுடன் தொடர்புடைய 8 பேருக்கு, யாழ்ப்பாணம் நீதிவான் நீதிமன்றம் வழங்கிய தண்டணையை யாழ்ப்பாணம் மேல் நீதிமன்ற நீதிபதி மா.இளஞ்செழியன் இன்று (12) உறுதி செய்தார்.
பொலிஸாரால் டில்லு குறூப் என அழைக்கப்பட்ட இளைஞர்கள் குழுவைச் சேர்ந்த 8 பேருக்கே, தண்டனை உறுதி செய்யப்பட்டுள்ளது.
யாழ்ப்பாணம் மடம் வீதியில், 2012ஆம் ஆண்டு ஜூலை 5ஆம் திகதி விமலராஜன் விக்னராஜா என்பவரை வாளால் வெட்டிக்காயப்படுத்திய குற்றச்சாட்டில் 9 பேர் யாழ்ப்பாணம் பொலிஸாரால் கைது செய்யப்பட்டு, யாழ்ப்பாணம் நீதிவான் நீதிமன்றில் வழக்கு தாக்கல் செய்யப்பட்டது.
5 ஆண்டுகள் விசாரணைகளின் நிறைவில், கடந்த மே 16ஆம் திகதி, சத்தியநாதன் அன்ரனிஸ் அல்லது டில்லு, அரவிந்தன் அலெக்ஸ் மற்றும் சிவேந்திரன் கலிஸ்ரன் ஆகியோருக்கு 3 ஆண்டுகள் கடூழியச் சிறைத் தண்டனை விதிக்கப்பட்டது.
மேலும், விஜயரத்தினம் ஜனுசன், ஜெகதீஸ்வரன் டிரெக்ஸ்காந்தன், அருந்தவராஜ் செந்தூரன், பெனடிக்ட் வெஸ்லி ஏபிரகாம், தேவராசா ஹரிசன் ஆகியோருக்கு ஓர் ஆண்டு சிறைத் தண்டனை வழங்கப்பட்டது.
அத்துடன், பாதிக்கப்பட்டவருக்கு 8 குற்றவாளிகளும் 50 ஆயிரம் ரூபாய் இழப்பீடு வழங்க வேண்டும் எனவும் அதனைச் செலுத்தத் தவறின் ஓர் ஆண்டு சாதாரண சிறைத் தண்டனையை அனுபவிக்கவேண்டும் என யாழ்ப்பாணம் நீதிமன்ற நீதிவான் சி.சதீஸ்தரன் தீர்ப்பளித்தார்.
இதையடுத்து, நீதிவான் நீதிமன்ற தீர்ப்பை ஆட்சேபித்து குற்றவாளிகள் 8 பேர் சார்பிலும், அவர்களது சட்டத்தரணிகள் யாழ்ப்பாணம் மேல் நீதிமன்றில் மேன்முறையீடு செய்தனர்.
இந்த நிலையில் 8 பேரின் மேன்முறையீட்டு மனுக்கள் மீதான தீர்ப்பை, யாழ்ப்பாணம் மேல் நீதிமன்ற நீதிபதி இன்று (12) உறுதி செய்து, 8 சந்தேகநபர்களும் தலா 1,500 ரூபாய் அபராதம் செலுத்தவேண்டும்” என்று உத்தரவிட்டார்.
அத்துடன், மேன்முறையீட்டு மனு மீது தீர்ப்பளிக்கப்பட்டதால் மேல் நீதிமன்றால் பிணை வழங்கப்பட்ட இருவரினதும் தண்டனைக்காலம், நாளை (செவ்வாய்க்கிழமை) ஆரம்பமாவதை நீதிவான் நீதிமன்றம் உறுதிப்படுத்த வேண்டும் எனவும் நீதிபதி உத்தரவிட்டார்.
